15.04.2013
Bu gün ADP İdarə Heyətinin
növbəti toplantısı keçirilib.
Toplantıda ölkə və beynəlxalq aləmdə baş verən
ictimai-siyasi proseslər əsas müzakirə obyekti olub. İdarə Heyəti üzvləri ilk
növbədə Avropa İttifaqının genişlənmə və qonşuluq siyasəti üzrə müşaviri
S.Fulenin Azərbaycan rəsmiləri görüşdə səsləndirdiyi bəyanata və Artikl 19
Beynəlxalq İnsan Hüquqları təşkilatının ölkəmizdə davam edən repressiyalarla
bağlı verdiyi bəyanata münasibət
bildirib. Qeyd olunub ki, onun bu görüş zamanı hakimiyyətin indiki siyasətinin
Avropa İtifaqı ilə Azərbaycan arasında əlaqələrə mənfi təsir göstərməsini dilə
gətirməsi və ölkədə həbslərin davam etməsi, iqtisadi azadlıqların
məhdudlaşdırılması, əsaslı islahatların keçirilməməsi kimi faktları diqqətə
çatdırması bu qurumun hakimiyyətin hazırkı siyasətindən narazalığın ifadəsidir.
İdarə Heyəti isər Artikl-19 təşkilatının repressiyalarla bağlı bəyanatının,
istərsə də S.Fulenin səsləndirdiyi bəyanatın Azərbaycan reallıqlarını düzgün
əks etdirdiyini bildirib və hakimiyyəti Avropa Birliyinin tələblərinə uyğun
olaraq ölkədə əsaslı islahatlar keçirməyə, siyasi həbsləri aradan qaldırmağa,
repressiyalara son qoymağa və azad bazar iqtisadiyyatına stimul verən ciddi
iqtisadi addımlar atmağa çağırıb.
İdarə heyəti üzvləri
Rusiyada yaşayan azərbaycanlılara polis tərəfindən atəş açılması nəticəsində
baş verən ölüm hadisəsindən ciddi narahat olduğunu bildirib və hakimiyyəti bu
cinayətin baş verməsinə görə məsul olan
Rusiya hökumətindən izahat tələb etməyə və cinayətkarları cəzalandırmağa
səsləyib.
İdarə Heyəti üzvləri
Nəqliyyat Nazirliyinin əməkdaşları tərəfindən bir taksi sürücüsünün döyülməsi
faktını qətiyyətlə pisləyib və bu strukturda dəfələrlə bu cür hadisələrin
təkrarlanması tendensiyasının hökm sürdüyünü, hakimiyyət orqanları tərəfindən
vətəndaşlara sanksiyalaşmamış güc tətbiq etməsinin davam etdiyini diqqətə
çatdırıb, hakimiyəti ölkədə vətəndaş qarşıdurmasına və ölkə daxilində sabitliyə
xələl gətirən bu cür aqressiv münasibətdən geri durmağa, xalqa qarşı qoçuluq
edən Nəqliyyat nazirliyinin məsullarını ciddi cəzalandırmağa çağırıb.
İdarə Heyəti üzvləri
hakimiyyətin son vaxtlatr ATƏT-in Bakı ofisinin fəaliyyətinin məhdudlaşdırılması,
həmçinin Azad Fikir Universiteti və bir neçə digər qht-nin qapadılması istiqamətində, ümumiyyətlə Azərbaycanda insan hüquq azadlıqları ilə məşqul olan
beynəlxalq təşkilatların fəaliyyətinə birbaşa və ya dolayı yolla əngəllər yaratmasını
pisləyib və bu hərəkətlərin Avropaya daha
sıx inteqrasiya yolunda ciddi problemlər yaradacağını diqqətə çatdırıb.
İdarə heyəti üzvləri ABŞ-ın
Men ştatında seperatçı Dağlıq Qarabağ rejiminin müstəqil dölət kimi tanınması
barədə qətnamə qəbul etməsindən narahat olduğunu bildirib və bu cür addımların
ABŞ-ın ATƏT-in Minsk qrupundakı fəaliyyəti ilə daban-dabana zidd olduğunu,
adıçəkilən qətnamənin bu ölkənin digər ştatlarının Xocalı soyqırımı haqqında
qəbul etdiyi ədalətli qərarlara və ABŞ-ın beynəlxalq sülh prosesində oynadığı
rola qətiyyən uyğun gəlmədiyini diqqətə çatdırıb.
İdarə Heyəti üzvləri respublikamızda Güney Azərbaycan
soydaşlarımızın hüquqlarının müdafiəsi ilə bağlı tədbirlərin keçirilməsindən
əndişə duyan İran rəsmilərinin ölkəmizə qarşı təhdid dolu bəyanatlarından, onların əsassız olaraq Şimali Azərbaycanı İrana
birləşdirmək kimi sərsəm cəhdlərindən narahat olduğunu diqqətə çatdırıb və İran
rəsmilərinin bu aqressiv hərəkətlərini iki qonşu və dost ölkə arasında
qarşılıqlı münasibətlərə xələl gətirən hərəkətlər olduğunu onların diqqətinə
çatdırıb. ADP İH-də həmçinin qeyd olunub ki, Azərbaycanın iki yerə
parçalanmasına səbəb olan Türkmənçay müqaviləsinin tərəfi Qacarlar dövləti olub
ki, bunun da indiki İranla heç bir əlaqəsi yoxdur və əgər bu müqavilə İran rəsmilərinin
dediyi kimi ləğv ediləcəksə bu yalnız bütöv Azərbaycan dövlətinin yaranması ilə
nəticələnməlidir.
